TESTAMENTO 2012
Concitadini
zovini e veci, mofalconesi indigeni e oriundi, taliani del nord, cabibi del sud,
bangla del centro, via sant’Ambrogio compresa.
Semo
de novo qua in piassa, in piassa dela repubblica che come che se disi: un nome
un destin, la xe a tochi. Son qua per veder de lassarve qualcossa ma co sta
crisi che gira i ga scurtà par tuto. Ierimo classificadi con tre A, i ne ga
lassado una sola, gavevimo Tremonti, i ne ga lassado un solo, gavevimo tante
passere e i ga lassado un sol, e anca omo. Gente, xe rivado l’omo del monte e
drio l’anda al ne farà al cul come un ananas. Al ga comincià a taiar i
finansiamenti de qua e de là, al ga slongà l’età par andar in pension (che ghe
vegne un colpo) al ga solo dito che saria de eliminar le province e li xe vignù
fora un putiferio, i politici se ga impissado come fuminanti i ga perfin tirà
fora che saria contro la costitussion.
Mi volessi però ricordarghe che la nostra costitussion disi
anche che la nostra xe una nassion fondada sul lavoro, e sentì ben, go dito
lavoro e no ciacole, andè a lavorar lazaroni. Si, parchè lori fa sol che tavoli:
le fabbriche sera? Facciamo un tavolo. I licensia i operai? Facciamo un tavolo.
Noi rinnova i contratti? Facciamo un tavolo. Ma scuseme, tuti sti tavoli par
cossa li fe, parche se stufi de magnar in pie?
E
voi de la magnadora qua soto, cossa pensè de sugarvela? Mi qua sora ta sto
transatlantico carolà e sbilenco e voi, pena che al ga comincià a cricar e
sbandar se la gavè mocada par tuta Mofalcon. Save cossa che ve digo: “Tornè a
bordo! Cazzo!”.
A
proposito, cari concitadini, devo dirve che la magnadora xe cambiada, ma forse
se gave già acorto del cambiamento parchè no se vede più in giro in bicicleta al
presentador de striscia la notissia, adesso in bicicletta gavemo le veline.
Quela bionda che fa al capo e quela mora che volessi farlo. Gavemo anche
l’assessor che no sa niente ma siccome al gaveva già avertì che nol iera
preparado, xe stado più che natural nominarlo. A le finanse i ga messo un mulon
che al ga imparà subito al mestier al te dise che nol ga un cussi al se cava al
pensier. Gavemo quel che par fortuna nol ga capì che i frati dela Marceliana
serarà la cesa se no ve imaginè che rassa de rotondonona che al gavessi fato.
Quel che me preocupa un pochetin xe al vicepodestà parchè con tuto quel che se
sente in giro par l’Europa proprio un che fa de nome Greco i doveva
metar?
Concitadini
tuti, anche cabibi, si anche lori parchè in fin dei conti i ne da una man a far
e disfar le barche cussi al lavor qua no mancarà. Se i greci ga crisi, meio,
cussi podaremo andar là in crociera co quei quatro schei che ne resta parchè
forse costarà de meno. No ste preocuparve de quel che pol suceder parchè xe
raro, andar in crociera xe belon, xe la musica, xe i baleti, xe le feste, te fa
ginastica, te magne ben, però prima deghe un ociada al menù e se ghe xe i
spaghetti allo scoglio, no ste andar.
Se
volè za prenotar, vardè che qua gavemo dele agenzie de viaggio più che
efficenti, pensè che qua i paroni ciapa al volo prima dei
clienti.
Concitadini,
c’è crisi, c’è crisi, co ste storie, gavemo imparado anca parole nove che no
savemo e savaremo mai cossa che vol dir. I ne ga frantumado i zebedei co sto “spred” che no go
ancora capì cossa che centra però la gente se preocupava e alora te sentivi che
al marì ghe diseva a la moglie: “Ciò, Maria i ga dito par la television che xe
aumentà al spred” e ela che ghe rispondeva: “Te go dito mi, mona de omo, de
ciorlo col iera in oferta in botega”. No xe soldi, co te va in banca xe quei dei
sportei che i te varda coi oci spalancai e i te domanda: “Cossa la cerca?”.
“Soldi, cossa volè che cerco”. “E qua la vien?” i te
risponde.
Pensa ti, ste banche, ghe
sparissi i schei gnanca che le fossi un
partito politico. E se lori no i se acorsi se ghe sparissi i sui, provè a pensar cossa che ghe
frega dei vostri.
Par cossa pensè che adesso i pensa
de cavarghe le merendine ai fioi, miga per no farli ingrassar, macchè, xe per
abituarli a no magnar.
Però xe ancora qualchidun che ga do
euri messi in taio e visto che qua case svode no ne manca al comprassi anca
qualcossa, se proprio proprio nol trova qualchidun che ghe compre una casa sensa
che al se acorse, e alora i te domanda: “Ciò, ti che te sta a Mofalcon, come xe
che se vive lì?” Ben insoma no xe mal” “Ma come se sta? Ben o mal” “Ma,
insomma…Benes” “Go capì, vardo se trovo qualcossa a
Staransan!”
Concittadini, mofalconesi, xe rivà
al momento, ciapeve in eredità ste quatro crodighe che mi son stufo de portarme
sempre drio.
Ve lasso al palasso dela magnadora
che al pica e el pende e mai nol vien zo. Ve informo che pararia che i vol far
al gemellaggio con la città de Pisa, visto che la i xe za pratici
dell’argomento. Come al solito xe vignù fora un de quei savudi che ga
dito:”Varda che la xe mile ani che la tore pende” “Omo -ghe go dito mi- e qua
quanti ani te pense che i staghe per giustarlo!”
El casca, nol casca, quel che
resiste però xe al bar Municipio. Prima i ghe ga proibido de balar, dopo noi
podeva gnanca far musica parchè vibrava tuto, gnanca a flipper no te pol sugar
parchè sbatendolo te ris’ci de mandar in tilt al palasso. Adesso, tal cesso dei
omini i ga messo un cartel: “vietato scrollarlo, pericolo di
crollo”
Sto Nadal i ga pensà de far qua
soto al presepio ma credo che al sia stà abusivo, parchè ora che te fassi
domanda all’ufficio tecnico, che manca sempre qualcossa, che te presente tute le
carte, che manca sempre qualcossa, che te gapie l’autorizzazion, che manca
sempre qualcossa, che te gapie l’abitabilità, sto por putel invese che a Nadal
al nasseva a ferragosto.
Ve lasso anca sta piassa, sempre
più imbiecada. L’altro giorno go visto un grumo de gente vissin li de la pretura
e iera ingegneri, geometri, architeti, capeti e impiegati vari che vardava un
murador, poret, solo come un can, che scavava, varda caso, le uniche piere bone.
I me dise che i stava fasendo una verifica par decider de chi che iera la colpa
de quel cesso de lavor. Morale de la storia, xe vignù fora che no xe colpa de
nissun xe stà solo che “un errore di scrittura”: sul contrato invece de scriver:
“si consiglia di fare in pietra istriana”, i ga scrito: “si consiglia di fare
gli istriani sulla pietra” e ti paga, mona!
Visto che semo in zona, ve lasso
anca al corso. Gira vose che par al Corso gavarà de passar un disastro de camion
no xe miga che la sindachessa che de note no la dormi par i pensieri che la ga i
li fassi passar par casa sua cussi la se indormensa
contandoli?
Vero o no vero, i tornarà a metar
le man sula pavimentassion del Corso parchè cussì no va ben, se spaca tuto e le
piere salta fora, i ga dito che stavolta i cambia sistema i lo farà “a dorso di
mulo”, iera sempre ora, fin desso lo gave fato “a casso de
can”.
Qua intorno go sentì che i dovessi
far na roba, che no go capì ben cossa che xe che me par dovessi ciamarse pissus.
Ste sentir no ste sforsarve e no ste butar via i schei che a quel ghe ga za
pensà più de qualchidun, basta far un giro par via Sant’Ambrogio e la piasseta
dei giudici che te sinte spussa de tanto de quel pissus che metà
basta.
Concitadini, ve lasso al mercà,
ancora dirè voi, ebbene si, par tuta la vita, parchè dopo tute le aste che i ga
fato i se ga inacorto che gnanche regalandolo no lo ciol nissun. Ste sentir no
ste spender schei par far i abbeveratoi par i cani, verzè le porte del mercà, no
ocore che ve digo che li acqua no manca. Ve lasso anca quel settimanal, adesso
finalmente go capì parche i lo ciama mercato ambulante, parchè una volta al iera
in piassa, dopo al xe andà un poc in vial e un poc in piassa Borsellino, qualche
tochet in qua e in là, dopo al xe tornà in piassa. Go capì che par television i
dise sempre che i mercati xe in movimento, ma no in sta
maniera.
Ve lasso anca le terme tanto par no
farve mancar niente, pararia che le sia finide, chissà se rivaremo andar a far i
bagni parchè se i le verzerà alora volarà dir che anca la professia dei Maya xe
vera e ghe sarà la fine del mondo. Se noi le verzerà, pasiensa, intanto femo
dozento posti barca cussi podaremo essar i primi in Italia a portar le barche a
far le terme.
Concittadini, volessi dir due
parole anca par quei de Staransan par via del casin che i ga col ponte li de
la Checca. Go
sentì che quei de la comun ga cercà contatti in giappon par finir al lavoro.
Feme un favor, avertili che i inglesi che lavorava sul ponte del fiume Kwai i xe
tornai a casa.
Concitadini, a no speta un momento:
mesogiorno xe passà, la pansa comincia a bulegar, scuseme un atimo devo
domandarghe una roba a la nostra podestà, ciò bela, visto che te ga za butà al
sal, quando te bute la pasta? Però no so se gavè visto, dato che al sal no ga
servì, da brava dona de casa co la spassatrice la ga fato cior su tuto che no se
buta via niente. La te xe andada ben che no ga nevigà al giorno dopo se no te
ieri frita.
Adesso permeteme un piccolo ricordo
per una persona che per ani ga colaborado col Carneval e che da pochi giorni la
ne ga lassado, conossendola ben, me stago imaginando dove che la xe, el casin
che la sta fasendo parchè xe diesemila ani che i ga sempre quel vestito. Ciao
Graziella.
Maestro, xe Carneval, femo un bel
casin anche noi…taca banda
